About Me.

 હવે લાગે છે મારા વિષે થોડું વધારે જણાવું. પિતા શ્રીરતનસિંહજી વકીલ  હતા, દાદા શ્રીમોતીસિંહજી  જુના કડાણા સ્ટેટના દીવાનસાહેબ  હતા. મૂળ અમે ગુજરાતના પ્રથમ  વ્યવસ્થિત  રાજા વનરાજ ચાવડાનાં  સીધા જ વંશજો. અમારું માણસા ગામ  ત્રીજા વર્ગનું રાજ્ય. ત્રણસો વર્ષ પહેલા વડવાઓ  રોયલ  વંશમાંથી, મોટાને ગાદી મળે બીજા બાજુ પર નવી કેડી કંડારે એ રીવાજે બાજુ પર ખસી ગયેલા. ૧૮૫૭ની આસપાસ  ખંડેરાવ  ગાયકવાડના લશ્કરે માણસા ઉપર  હુમલો કરેલો પણ માણસાના રજપૂતોએ બહાદુરીથી લડીને એની આણ સ્વીકારેલી નહિ. પિતા વિજાપુરની લાયબ્રેરીના પ્રમુખ પણ હતા. એટલે નાનપણથી વાંચવાનો શોખ  વારસામાં મળેલો. પિતા થીઓસોફીસ્ટ અને ખુબ વાચે. મને પણ લગની લાગેલી વાચવાની. ૧૯૫૭ની પહેલી જાન્યુઆરીએ જન્મ(ન્યુ ઈઅર બેબી)વિજાપુરમાં, દસ  ધોરણ  સુધી વિજાપુરમાં જ ભણ્યો. ધૂમકેતુ, મુનશી, પન્નાલાલ, પેટલીકર, ર.વ.દેસાઈ, મેઘાણી અને બીજા અનેક લેખકોને વાંચી નાખેલા. કવિતાઓ  વાચવાની ઓછી ફાવે. પાંચ થી દસ ધોરણ સુધીમાં જેટલું વાંચ્યું હશે એટલું ફરી નહિ વાંચ્યું હોય. ક.માં.મુનશી અને ધૂમકેતુ પ્રિય લેખકો. પછી કોમર્સમાં ભણ્યો મહારાજા સયાજીરાવ યુની, બરોડામાં. બરોડા પ્રિય સીટી. ૧૯૮૨ લગ્ન, ત્રણ દીકરા, માણસામાં થોડી ખેતી કરી અને પાછો વડોદરે સ્થાયી થયો. શ્વસુરે મુકેલી ફાઈલ  પર ૨૦૦૫માં આવ્યો અમેરિકા..અમે ચાર ભાઈઓ અને એક બહેન. ચાર ભાઈઓના કુટુંબમાં મારા સિવાય, બે વૈજ્ઞાનિક, બે એમ.બી.એ., ત્રણ પી.એચ.ડી., ત્રણ એન્જીનીયર, એક સ્કુલના પ્રીસીપાલ, બે પ્રોફેસર… 
અંધશ્રદ્ધા, અંધવિશ્વાસ અને અવૈજ્ઞાનિક માન્યતાઓ વિરુદ્ધ લખવાનું ગમે છે. સત્ય કડવું હોય છે. એમાં સુગર નાખવાનો પ્રયત્ન કરી કરીને કેટલો કરાય? આપણે કોઈની ધાર્મિક લાગણી દુભાવવી નથી. પણ એમજ કોઈની ધાર્મિક લાગણી દુભાઈ ના જાય એવું વિચારી  સત્ય લખવાથી શું ડરવું? સાયકોલોજી અને ઈવોલ્યુશનરિ સાયકોલોજી અને માનવ સ્વભાવના જટિલ કોયડાઓ  વિષે અભ્યાસ કરીને  લખીને અહીં મૂકવાનું શરુ કર્યું છે. આશા છે કે મિત્રોને ગમશે. મારા વિષે મારા કરતા મારા લખાણો વધારે કહેશે.